वासिङ्टन डीसी । अमेरिकी राष्ट्रपति डोनाल्ड ट्रम्पले एउटा कार्यकारी आदेशमा हस्ताक्षर गरेका छन् । अमेरिकाले कब्जामा लिएको भेनेजुएली तेल बेचेर हुने आम्दानी जफत गर्नबाट अदालत वा भेनेजुएलाका कर्जादाता कम्पनीहरूलाई रोक्न ट्रम्पले सो आदेशमा हस्ताक्षर गरेको शनिबार ह्वाइट हाउसले बताएको हो । विदेशी सरकारको निक्षेप कोषमा रहने सो आम्दानी भेनेजुएलामा शान्ति, समृद्धि र स्थायित्व सृजना गर्ने काममा प्रयोग गरिनुपर्ने आदेशमा भनिएको छ । अमेरिकी सेनाले राजधानी कारकासमा आक्रमण गरेर भेनेजुएली राष्ट्रपति निकोलस मादुरोलाई समातेको एक हप्ता नबित्दै शुक्रबार यस आदेशमा हस्ताक्षर भएको हो ।
.gif)
भेनेजुएलाले तेल क्षेत्रको राष्ट्रियकरण गरेपछि एक्जोन मोबिल, कोनोकोफिलिप्स लगायतका कयौँ कम्पनीहरू त्यहाँ भएको आफ्नो अर्बौ डलरको लगानी, व्यापार व्यवसाय सबै छाडेर बाहिरिन बाध्य भएका थिए । आफ्नो पैसा फिर्ता पाउनुपर्ने दाबी यी कम्पनीहरूको छ । शनिबारको आदेशमा कुनै पनि कम्पनीको नाम उल्लेख गरिएको छैन ।यद्यपि, यो पैसा भेनेजुएलाको सार्वभौम सम्पत्ति भएको र यसलाई निजी दाबी भुक्तानीमा नभएर कूटनीतिक उद्देश्यमा प्रयोग गरिने आदेशमा ट्रम्पले भनेका छन् । भेनेजुएली तेल बेचेको पैसा जफत भएमा भेनेजुएलामा आर्थिक र राजनीतिक स्थायित्व ल्याउने अमेरिकी प्रयास कमजोर हुने भएकोले ट्रम्पले सो अवस्था आउन नदिन खोजेको ह्वाइट हाउसले एउटा फ्याक्ट सिटमा भनेको छ ।भेनेजुएलाको अन्तरिम सरकारले अमेरिकालाई ५ करोड ब्यारेलसम्म तेल उपलब्ध गराउने सहमति गरेको छ । तर यो परिमाणको तेल कति अवधिभित्र उपलब्ध गराउने हो भनेर स्पष्ट बताइएको छैन ।
