काठमाडौं । नेपाल आयल निगमले काठमाडौं उपत्यका तथा आसपासका जिल्लामा खाना पकाउने एलपी ग्यासको आपूर्ति सहज बनाउन वैकल्पिक व्यवस्था मिलाएको छ।
.gif)
पछिल्लो समय ग्यासको आपूर्ति तथा वितरणमा देखिएको असहजतालाई ध्यानमा राख्दै निगमले उपभोक्तालाई सहज रूपमा ग्यास उपलब्ध गराउने उद्देश्यले विभिन्न वैकल्पिक माध्यमबाट वितरण व्यवस्थालाई निरन्तरता दिएको हो। यसअघि पनि निगमले उपत्यकाका विभिन्न स्थानबाट ग्यास बिक्री वितरणको व्यवस्था मिलाएको थियो।
निगमले अत्यावश्यक अवस्थामा रहेका उपभोक्तालाई लक्षित गरी काठमाडौंका विभिन्न स्थानबाट ग्यास सिलिन्डर बिक्री गर्ने व्यवस्था गरेको थियो। त्यस्ता बिक्री केन्द्रमा उपभोक्ताले नागरिकता प्रमाणपत्र वा राष्ट्रिय परिचयपत्र देखाएर ग्यास खरिद गर्नुपर्ने व्यवस्था गरिएको थियो।
यसअघि निगमले टेकुस्थित कार्यालय परिसरबाट समेत विभिन्न ग्यास उद्योगका सिलिन्डर बिक्री वितरण गर्दै आएको थियो। बजारमा ग्यासको आपूर्ति सहज बनाउन उद्योगी तथा विक्रेतासँग समन्वय गर्दै वितरण प्रणालीलाई व्यवस्थित बनाउने प्रयास भइरहेको निगमले जनाएको छ।
निगमले उपभोक्तालाई आवश्यकता अनुसार मात्र ग्यास खरिद गर्न र अनावश्यक रूपमा सिलिन्डर सञ्चय नगर्न आग्रह गर्दै आएको छ। आपूर्ति प्रणालीलाई थप प्रभावकारी बनाउँदै वास्तविक आवश्यकता भएका उपभोक्तासम्म ग्यास पुर्याउने उद्देश्यले वैकल्पिक वितरण व्यवस्था अघि बढाइएको हो।
यसअघि काठमाडौं उपत्यकाका विभिन्न सात स्थानबाट समेत ग्यास बिक्री वितरण गरिएको थियो। टेकु, चपली, कीर्तिपुर, नयाँबजार, तारकेश्वर, चन्द्रागिरि तथा भक्तपुरको ठिमीबाट विभिन्न ब्रान्डका ग्यास सिलिन्डर उपलब्ध गराइएको थियो।
निगमले बजारमा कृत्रिम अभाव सिर्जना हुन नदिन तथा उपभोक्ताले सहज रूपमा खाना पकाउने ग्यास पाउने वातावरण बनाउन वितरण प्रणालीलाई थप व्यवस्थित र पारदर्शी बनाउने जनाएको छ।
ग्यासको आपूर्ति तथा वितरणमा समस्या देखिएमा उपभोक्ताले सम्बन्धित निकायमा जानकारी गराउनसमेत निगमले आग्रह गरेको छ। वैकल्पिक व्यवस्थामार्फत आपूर्ति सहज बनाउने प्रयासले काठमाडौं उपत्यका तथा आसपासका क्षेत्रमा खाना पकाउने ग्यासको अभाव र वितरणसम्बन्धी समस्या न्यूनीकरण हुने अपेक्षा गरिएको छ।
