काठमाडौँ । नेपाल धितोपत्र बोर्ड (सेबोन)ले नेप्सेलाई निर्देशन दिएर सूचीकृत कम्पनीको अवस्था र कारोबारमा निगरानी गर्न भनेको छ । सेबोनले रसुवा बाढीका कारण जलविद्युत् आयोजनाहरूमा पुगेको क्षतिको यथार्थ विवरण तत्काल सार्वजनिक गर्न नेप्सेलाई निर्देशन दिएको हो । विशेष गरी त्रिशूली र भोटेकोशी नदी प्रणालीमा सञ्चालनमा रहेका तथा निर्माणाधीन विभिन्न जलविद्युत् आयोजना र प्रसारण संरचनामा क्षति पुगेको सन्दर्भलाई जोड्दै बोर्डले लगानीकर्ताको हित संरक्षण र बजारको पारदर्शिताका लागि यस्तो कदम चालेको हो । धितोपत्र सम्बन्धी ऐन, २०६३ को दफा ८४ को उपदफा (१) ले दिएको अधिकार प्रयोग गर्दै बोर्डले प्रभावित कम्पनीहरूको विस्तृत सूची तयार गरी तत्काल जानकारी गराउन नेप्सेलाई पत्राचार गरेको छ ।
.gif)
बोर्डले जारी गरेको निर्देशनमा प्रभावित कम्पनीहरूले आफ्नो आयोजनाको नाम, स्थान, विपद्को प्रकृति, र आयोजनामा भएको प्रारम्भिक भौतिक क्षतिको विवरण आधिकारिक माध्यमबाट सार्वजनिक गर्नुपर्ने उल्लेख छ । यसका साथै विद्युत् उत्पादन बन्द भएको वा प्रभावित भएको अवस्था, अनुमानित उत्पादन क्षमतामा आएको ह्रास, मानव संशाधनमा भएको क्षति, र प्रसारण तथा वितरण पूर्वाधारमा परेको प्रभावबारे पनि स्पष्ट पार्न भनिएको छ ।
लगानीकर्ताहरूलाई सुसूचित गराउनका लागि कम्पनीको बिमा भए वा नभएको अवस्था, बिमा कम्पनीसँग गरिएको दाबीको विवरण, प्रारम्भिक वित्तीय प्रभाव, र आयोजना पुनः सञ्चालन हुन लाग्ने अनुमानित समय जस्ता संवेदनशील सूचनाहरू पनि अनिवार्य रूपमा सार्वजनिक गर्न बोर्डले निर्देशन दिएको छ । त्यस्तै प्राकृतिक विपत्तिको समयमा बजारमा हुनसक्ने अस्वाभाविक चलखेललाई रोक्न बोर्डले नेप्सेलाई विशेष निगरानी राख्न समेत सचेत गराएको छ । प्रभावित कम्पनीहरूको सेयर कारोबारमा हुनसक्ने अस्वाभाविक मूल्य परिवर्तन, कारोबार परिमाणमा आउने असामान्यता, र महत्वपूर्ण सूचना सार्वजनिक हुनुअघि हुनसक्ने भित्री कारोबार (इन्साइडर ट्रेडिङ) लाई नजिकबाट अनुगमन गर्न भनिएको छ ।
