काठमाडौँ। भदौ १० गते आएको विनाशकारी बाढीबाट प्रभावतिहरुका लागि फ्रान्सले मानवीय सहायता सामग्री उपलब्ध गराएको छ ।विनाशकारी बाढीपछि तत्काल राहत र पुनरुत्थान कार्यलाई मजबुत बनाउन नेपालस्थित फ्रान्सको दूतावासले राष्ट्रिय विपद् जोखिम न्यूनीकरण तथा व्यवस्थापन प्राधिकरणलाई मङ्गलबार राहत सामग्री उपलब्ध गराएको फ्रान्सेली दूतावासले जनाएको छ ।फ्रान्सले म्याट, सरसफाइ किट, भान्साका सामान, पानी शुद्धीकरण गर्ने ट्याब्लेट, सोलार बत्ती र औषधि किट उपलब्ध गराएको दूतावासले जानकारी गराएको छ । सरकारले युरोपेली सङ्घको नागरिक सुरक्षा संयन्त्रमार्फत गरेको अनुरोधका आधारमा यी सामग्रीहरू उपलब्ध गराइएको दूतावासले विज्ञप्तिमार्फत जानकारी गराएको छ ।
.gif)
यी सामग्रीहरू नेपालका लागि फ्रान्सका राजदूत फ्रान्स्वाज पुइग–इन्जाले विज्ञान, प्रविधि तथा नवप्रवर्तन मन्त्री महावीर पुनलाई हस्तान्तरण गरेका छन् । राजदुत पुइग–इन्जाले यो दुखद् घडीमा फ्रान्स नेपाल सरकार र नेपाली जनताको साथमा रहेको उल्लेख गरे । यो आपत्कालिन सहयोगका साथै भविष्यमा थप सहयोग गर्ने प्रतिबद्धता जनाएको छ ।यो आपत्कालीन मानवीय सहायताका अतिरिक्त, फ्रान्स सरकारले संयुक्त राष्ट्र सङ्घका एजेन्सीहरू, रेडक्रसको अन्तर्राष्ट्रिय महासङ्घ र फ्रान्सका एक्सन अगेन्स्ट हयाङ्गर र ट्रायङ्गल जेनेरेसन ह्युम्यानाटायरमार्फत प्रभावित क्षेत्रमा उद्धार तथा खोजमा सहयोग गरिरहेको छ।
