लमजुङ, २३ भदौ । पृथ्वी राजमार्गअन्तर्गत धादिङको कृष्णभीरमा सडक भासिएपछि लमजुङ–काठमाडौं यात्रामा प्रत्यक्ष असर परेको छ । नियमित मार्ग अवरुद्ध हुँदा बेँसीसहरबाट काठमाडौं जाने सवारीसाधनले लामो वैकल्पिक बाटो प्रयोग गर्नुपरेपछि यात्राको समय र खर्च दुवै बढेको छ ।
.gif)
यसअघि करिब पाँचदेखि छ घण्टामा पूरा हुने बेँसीसहर–काठमाडौं यात्रा अहिले १२ देखि १३ घण्टासम्म लाग्ने गरेको छ । सडक अवरोधका कारण सार्वजनिक सवारीसाधनको सङ्ख्या घट्नुका साथै यात्रुको चापसमेत कम भएको व्यवसायीले बताएका छन् ।
भदौ १४ गते कृष्णभीरमा सडक भासिएपछि बेँसीसहरबाट काठमाडौं सञ्चालन हुने माइक्रोबस तथा ठूला बस चितवन, हेटौँडा हुँदै दक्षिणकालीको वैकल्पिक मार्गबाट सञ्चालन भइरहेका छन् । लामो र घुमाउरो बाटोका कारण सवारीसाधनको सञ्चालन खर्च बढेपछि यात्रुले तिर्ने भाडासमेत उल्लेख्य रूपमा बढेको छ ।
बेँसीसहर माइक्रो काउन्टरका अनुसार सडक अवरुद्ध हुनुअघि दैनिक ४० देखि ५० वटा माइक्रोबस काठमाडौं जाने गरेकामा अहिले पाँचदेखि सात वटामात्र सञ्चालनमा छन् । अत्यावश्यक काम परेका यात्रुले मात्रै काठमाडौं जाने गरेका छन् ।
सडक अवरुद्ध हुनुअघि डिजेल माइक्रोबसको भाडा रु ९०० र विद्युतीय माइक्रोबसको रु ७०० रहेकामा अहिले क्रमशः रु दुई हजार र रु एक हजार ५०० पुगेको छ । यात्रु तथा सवारीसाधनको सङ्ख्या घट्दा चालक र व्यवसायीको आम्दानीमा समेत असर परेको छ ।
बेँसीसहर–काठमाडौं माइक्रोबसका चालक मुस्कान राईका अनुसार वैकल्पिक मार्गबाट यात्रा गर्दा समय निकै बढेको छ । “बाटो लामो भएकाले समय पनि धेरै लाग्छ,” उनले भने।
ठूला बसमा पनि यात्रुको सङ्ख्या घटेको छ । पृथ्वी राजमार्ग बस काउन्टरका अनुसार यसअघि बेँसीसहरबाट काठमाडौं दैनिक पाँचदेखि छ वटा ठूला बस छुट्ने गरेकामा अहिले एउटा बसमात्र सञ्चालनमा छ । वैकल्पिक मार्गको दूरी र सञ्चालन खर्चअनुसार भाडा फरक पर्ने भएकाले हाल निश्चित भाडा निर्धारण गरिएको छैन । यसअघि सवारीसाधनअनुसार रु ९०० देखि रु एक हजार २०० सम्म रहेको भाडा अहिले दुई गुणाभन्दा बढी पुगेको छ ।
बिरामीलाई थप सास्ती
सडक अवरोधको प्रत्यक्ष असर उपचारका लागि काठमाडौं, चितवन र पोखरा रेफर हुने बिरामीमा समेत परेको छ ।
लमजुङ अस्पतालका सूचना अधिकारी अनिल रेग्मीका अनुसार अस्पतालमा उपचार सम्भव नभएका बिरामीलाई काठमाडौं, चितवन र पोखरा रेफर गर्ने गरिएको छ । काठमाडौं लैजानुपर्ने केही बिरामीलाई एम्बुलेन्समार्फत घुमाउरो बाटोबाट लैजानुपरेको छ भने कतिपयलाई पोखरासम्म एम्बुलेन्समा पु¥याएर त्यहाँबाट हेलिकप्टरमार्फत लैजानुपर्ने अवस्था आएको उन्ले बताएका छन् ।
सडक अवरोधका कारण बिरामी र आफन्तले थप समय तथा आर्थिक भार व्यहोर्नुपरेको रेग्मीको भनाइ छ ।
यात्रुको खर्च दोब्बरभन्दा बढी
बेँसीसहरकी प्रकृति श्रेष्ठले वैकल्पिक मार्गका कारण यात्रा निकै लामो र खर्चिलो भएको बताएका छन् । भदौ २० गते काठमाडौंको काम सकेर बेँसीसहर फर्किएकी श्रेष्ठले काठमाडौं जाँदा माइक्रोबसमा रु ९०० भाडा तिरेकोमा फर्किंदा रु दुई हजार तिर्नुपरेको बताएका छन् ।
“वैकल्पिक बाटो निकै लामो र थकाइलाग्दो रहेछ । वर्षाका कारण बाटो चिप्लो हुने र ठाउँठाउँमा पहिरोको जोखिमसमेत रहेकाले डर लाग्छ,” उनले भनिन ।
कृष्णभीरको सडक अवरोधका कारण लमजुङबाट काठमाडौं जाने यात्रु तथा व्यवसायी दुवै प्रभावित भएका छन् । नियमित मार्ग सञ्चालनमा नआएसम्म लामो दूरीको यात्रा, बढेको भाडा र वैकल्पिक मार्गमा रहेको जोखिमका कारण यात्रुले थप सास्ती खेप्नुपर्ने अवस्था देखिएको छ ।
