काठमाडौँ । कोशी प्रदेशमा कार्यालयको नियमन क्षेत्राधिकार भित्र पर्ने ४८७ सहकारी संस्था निष्क्रिय सूचीमा परेका छन् । यीमध्ये झापा जिल्लामा सबैभन्दा धेरै १३१ सहकारी संस्था निष्क्रिय भएका छन् भने मोरङमा ६७, सुनसरीमा ६२, इलाममा ४७, उदयपुर र तेह्रथुममा २६–२६ रहेका छन् ।
.gif)
त्यसैगरी, सोलुखुम्बुमा १२, ओखलढुङ्गामा २१, खोटाङमा १७, सङ्खुवासभामा १३, भोजपुर र धनकुटामा १७–१७, ताप्लेजुङमा १० र पाँचथरमा २१ सहकारी संस्था निष्क्रिय सूचीमा परेका छन् ।
प्रदेश सहकारी ऐन, २०७६ र सहकारी सङ्घसंस्था सञ्चालन, अनुगमन तथा लेखापरीक्षण सम्बन्धी मापदण्ड २०७८ अनुसार, कार्यालयले निष्क्रिय सहकारी संस्थाको तथ्याङ्क सार्वजनिक गरेको छ । कोशी प्रदेश सहकारी रजिष्ट्रार तथा प्रशिक्षण कार्यालयका रजिष्ट्रार भूपेन्द्र खनालका अनुसार, लगातार दुई वर्षसम्म आवश्यक विवरण नबुझाउने सहकारीलाई दफा ६० ९१० बमोजिम निष्क्रिय सूचीमा राखिएको हो ।
खनालले भने, “सूची सार्वजनिक भए देखि ३५ दिनभित्र नियामक निकायमा आवश्यक विवरण बुझाउन सहकारीहरूलाई सूचना दिइएको छ । कतिपय सहकारी संस्थाहरू सम्पर्कमा पनि आएका छन् ।” सहकारी संस्थाहरूको सम्पत्ति र दायित्व नभएको भए खारेजी प्रक्रिया अघि बढाइने कार्यालयका अनुगमन शाखा अधिकृत नगेन्द्र पराजुलीले जानकारी दिएका छन् ।
कोशी प्रदेशभरि हाल १,०७५ सहकारी संस्था दर्ता छन् भने निष्क्रिय सूचीमा पर्ने संस्थाहरूलाई प्रक्रिया पुरा गरी खारेज गर्ने अभियान सुरु गरिएको छ ।
