ललितपुर, २५ साउन । नेपाली कांग्रेस केन्द्रीय कार्यसमितिको बैठक आज पनि बस्दैछ । पार्टी सभापति गगनकुमार थापाको सभापतित्वमा आइतबारदेखि सुरु भएको बैठक आज अपराह्न १ बजे पार्टी केन्द्रीय कार्यालय बीपी स्मृति भवन, बीपी नगर, ललितपुरमा बस्नेछ ।
.gif)
आइतबारको बैठकमा सभापति थापाले समसामयिक राजनीतिक विषय तथा पार्टीका प्रस्तावित एजेन्डाबारे जानकारी गराएका थिए । महामन्त्री प्रदीप पौडेलले बैठकमा छलफलका लागि विभिन्न प्रस्ताव प्रस्तुत गराएका थिए ।
बैठकमा नेपाली कांग्रेसको १५औँ महाधिवेशनको तयारीलाई प्रमुख एजेन्डा बनाइएको छ । महाधिवेशन तयारीका क्रममा पार्टीको नियमावली तथा निर्वाचन निर्देशिका, सदस्यता अद्यावधिक र नयाँ सदस्यता वितरण, महाधिवेशन तयारी समिति गठन तथा विधान मस्यौदा समिति गठनलगायत विषयमा छलफल हुने भएको छ ।
त्यस्तै, महाधिवेशनका लागि प्रचारप्रसार, भोजन तथा आवास र मञ्च व्यवस्थापनलगायत उपसमिति गठन गर्ने विषय पनि बैठकमा छलफलका लागि प्रस्तुत गरिएको छ । केन्द्रीय कार्यसम्पादन समितिले गरेका निर्णय अनुमोदन गर्ने प्रस्तावसमेत बैठकको एजेन्डामा रहेको छ ।
कांग्रेसले पछिल्लो समय तराई–मधेशमा विकसित घटनाक्रम र सामाजिक सद्भाव कायम गर्ने विषयमा समेत छलफल गर्ने भएको छ । सरकारको १०० दिनपछिका गतिविधिको समीक्षा तथा प्रमुख प्रतिपक्षी दलका रूपमा संसद् र संसद्बाहिर कांग्रेसले निर्वाह गर्ने भूमिकाबारे पनि बैठकमा छलफल हुने जनाइएको छ ।
प्रदेश सरकारसँग सम्बन्धित पछिल्लो राजनीतिक परिस्थिति, सदस्यता व्यवस्थापनसम्बन्धी केन्द्रीय समितिका निर्णय अनुमोदन, नेपाली जनसम्पर्क समिति, समसामयिक राजनीतिक विषय तथा भ्रातृ संस्थाका विधानसम्बन्धी विषयसमेत बैठकका एजेन्डामा समावेश छन् ।
कांग्रेसको आगामी महाधिवेशनको तयारी, पार्टीको आन्तरिक संगठन व्यवस्थापन तथा पछिल्लो राजनीतिक परिस्थितिमा पार्टीको रणनीति तय गर्ने दृष्टिले बैठकलाई महत्वपूर्ण रूपमा हेरिएको छ ।
