एजेन्सी । स्वचालित ट्रकहरू विकास गरिरहेका दुई कम्पनीहरू अरोरा इनोभेसन र कोडियाक एआईले सार्वजनिक सडकहरूमा आफ्नो स्वचालित सवारी प्रविधिको परीक्षण गर्न क्यालिफोर्निया सवारी साधन विभागबाट अनुमति प्राप्त गरेका छन् ।कोडियाकले त परीक्षण सुरु पनि गरिसकेको छ । कोडियाकले क्यालिफोर्नियामा केही थान परीक्षण ट्रकहरूका साथ मुख्यतया आफ्नो माउन्टेन भ्यू कार्यालय वरपरबाट यसको सुरुवात गरिरहेको बताएको छ ।राज्यमा स्वचालित सवारी साधनहरूलाई नियमन गर्ने निकाय क्यालिफोर्निया डीएमभीद्वारा स्वीकृत अद्यावधिक नियमहरू अन्तर्गत दुवै कम्पनीहरूले यस वसन्त ऋतुमा परीक्षण अनुमतिका लागि आवेदन दिएका थिए । अप्रिल २८ मा स्वीकृत ती नियमहरूले सार्वजनिक सडकमा १० हजार पाउन्डभन्दा बढी तौल भएका चालकविहीन सवारी साधनहरूको परीक्षणमा लगाइएको प्रतिबन्ध हटाएका छन् र कम्पनीहरूलाई स्वायत्त हेभी–ड्युटी सवारी साधनहरूको परीक्षण र अन्ततः परिचालन गर्नका लागि नियामक मार्ग प्रशस्त गरेका छन् ।

उक्त निकायका अनुसार, कोडियाक र अरोराले सुरक्षा, बिमा, सवारी दर्ता, सुरक्षा चालकको योग्यता र अन्य आवश्यकताहरू सहित डीएमभीको अनुमति मापदण्डहरू पूरा गरेका छन् । परीक्षण अनुमतिहरूले स्टेयरिङ पछाडि एक मानव सुरक्षा अपरेटर हुनुपर्ने व्यवस्था गरेका छन् र कम्पनीहरूलाई गन्तव्यहरू बीचको सिधा मार्गमा बाहेक प्रति घण्टा २५ माइल वा सोभन्दा कम गति सीमा तोकिएका सडकहरूमा सञ्चालन गर्न निषेध गरेका छन् ।ती प्रतिबन्धहरूका बावजुद क्यालिफोर्नियाका राजमार्गहरूमा स्वचालित ट्रकहरूको सम्भावनाले विरोधलाई निरन्तरता दिइरहेको छ । गत साता टिमस्टर्स क्यालिफोर्नियाले राज्यको डीएमभी विरुद्ध मुद्दा दायर गर्याे जसमा उक्त निकायले सार्वजनिक सडकहरूमा स्वचालित ट्रकहरूलाई अनुमति दिँदा पर्न सक्ने सम्भावित आर्थिक प्रभावहरूको अध्ययन र सार्वजनिक खुलासा गर्नुपर्ने कानुनलाई छलेको आरोप लगाइएको छ ।

अलामेडा काउन्टीको राज्यको सुपेरियर कोर्टमा दायर गरिएको उक्त मुद्दाले डीएमभीले मोटर चालकहरूको सुरक्षा जोखिमलाई विचार गर्न असफल भएको आरोप पनि लगाएको छ ।स्वचालित सवारी विकासकर्ताहरूका लागि नयाँ नियमहरूले उनीहरूलाई आफ्नो गृह क्षेत्रमा परीक्षण र अन्ततः परिचालन गर्न अनुमति दिएका छन् । अरोरा र कोडियाक दुवै क्यालिफोर्नियामा छन् तर हालसम्म उनीहरूले स्वचालित हेभी–ड्युटी ट्रकहरूमा आफ्नो गृह–राज्यले लगाएको प्रतिबन्धका कारण टेक्ससमा आफ्नो परीक्षण र परिचालन गतिविधिहरू केन्द्रित गरेका थिए ।अरोराले मे २०२५ मा टेक्ससमा डलास–देखि–ह्युस्टन मार्गबाट सुरुवात गर्दै स्वचालित ट्रक सेवा सुरु गरेको थियो । त्यसयता कम्पनीले फोर्ट वर्थ र एल पासो, एल पासो र फिनिक्स, फोर्ट वर्थ र फिनिक्स र लारेडो तथा डलास बीचका मार्गहरू सहित थप मार्गहरू थपेको छ ।कोडियाकले जनवरी २०२५ मा पश्चिम टेक्सासको दुर्गम परमियन बेसिनमा अफ–रोड वातावरणमा व्यावसायिक चालकविहीन ट्रक सञ्चालन सुरु गरेको थियो । त्यसयता कोडियाकले डलास र ह्युस्टन बीचको मार्ग सहित राजमार्ग सञ्चालनहरूमा आफ्नो सेवा विस्तार गरेको छ ।