वासिङ्टन डीसी । अमेरिकी खाद्य तथा औषधि प्रशासन (एफडीए)ले रिभोल्युसन मेडिसिन्सले प्यान्क्रियाजको क्यान्सरको उपचारमा बनाएको नयाँ औषधिलाई स्वीकृति दिएको छ । बृहत ठूलो क्लिनिकल परीक्षणमा यस औषधिले उन्नत अवस्थामा पुगेका बिरामीको बाँच्ने अवधि दोब्बर बनाएको देखाएको थियो । ‘रेसनक्यु’ नाममा उपलब्ध हुने यो दिनमा एकपटक सेवन गर्ने चक्की औषधि हो । यसलाई पहिले उपचार गराइसकेका वा संयोजन किमोथेरापी लिन नसक्ने मेटास्टेटिक प्यान्क्रियाटिक क्यान्सरका बिरामीका लागि स्वीकृति दिइएको हो । औषधिले प्यान्क्रियाजका धेरै प्रकारका क्यान्सरमा ट्युमर बढाउन भूमिका खेल्ने आरएएस प्रोटिनका विभिन्न रूपलाई रोक्ने गरी काम गर्छ ।
.gif)
रिभोल्युसनका अनुसार अमेरिकामा रेसनक्युको ३० दिनको औषधिको मूल्य ३९ हजार ८०० डलर तोकिएको छ । कम्पनीले बिरामीका लागि आर्थिक सहयोगसमेत उपलब्ध गराउने जनाएको छ । औषधिको क्लिनिकल परीक्षणको नतिजा अप्रिलमा सार्वजनिक भएपछि यसको माग तीव्र रूपमा बढेको थियो । त्यसपछि एफडीएले गम्भीर वा ज्यान जोखिममा पर्ने रोगका बिरामीलाई नियामक स्वीकृति आउनुअघि नै परीक्षणबाहिर प्रयोगात्मक उपचार लिन दिने ‘कम्प्यासनेट युज’ कार्यक्रमअन्तर्गत औषधि प्रयोगका लागि छिटो अनुमति दिएको थियो ।रेसनक्यु एफडीएको शीघ्र स्वीकृति दिने नयाँ प्रक्रियाअन्तर्गत समीक्षा गरिएको थियो । यो प्रक्रियाले सामान्यतया १० देखि १२ महिना लाग्ने औषधि स्वीकृति प्रक्रियालाई एकदेखि दुई महिनासम्ममा सीमित गर्ने लक्ष्य राखेको छ । ‘यो स्वीकृतिले मुख्यतः आरएएसबाट सञ्चालित अग्न्याशय क्यान्सरमा केन्द्रित भएर एक दशकभन्दा बढी समयदेखि गरिएको हाम्रो कामलाई मान्यता दिएको छ । यो चिकित्सा, क्यान्सर जीवविज्ञान र औषधि विकासका सबैभन्दा कठिन चुनौतीमध्ये एक हो,’ रिभोल्युसनका प्रमुख कार्यकारी अधिकृत मार्क गोल्डस्मिथले भने ।
