काठमाडौं । नेपालले संयुक्त अरब इमिरेट्स (युएई) लाई ४४ रनले पराजित गर्दै एसीसी प्रिमियर कपको उपाधि जितेको छ। मलेसियाको क्वालालम्पुरस्थित वायुमस क्रिकेट ओभलमा नेपालले दिएको ३१४ रनको लक्ष्य पछ्याएको युएई ४९.१ ओभरमा २६९ रनमा अलआउट भयो।
.gif)
उपाधिसँगै नेपालले दोस्रोपटक एसिया कपमा स्थान पक्का गरेको छ। टस जितेर पहिले ब्याटिङ गरेको नेपालले निर्धारित ५० ओभरमा ९ विकेट गुमाएर ३१३ रन बनाएको थियो।
युएईका लागि राहुल चोपडाले उत्कृष्ट शतकीय पारी खेले। उनले १०५ बलमा ३ चौका र ४ छक्काको मद्दतले अविजित १०० रन बनाए। यद्यपि उनको शतक टोलीलाई जित दिलाउन पर्याप्त भएन।
युएईका तानीश सुरीले ४२, कप्तान हरप्रित सिंहले ३३ र सोहीब खानले ५२ रन बनाए। खुजाइमा बिन तान्भिरले १५ रन जोडे।
नेपालका लागि करण केसीले सर्वाधिक ३ विकेट लिए। ललित राजवंशीले २ तथा सन्दीप लामिछाने, दीपेन्द्रसिंह ऐरी, रोहित पौडेल, गुल्सन झा र वसिर अहमदले समान १–१ विकेट लिए।
आसिफको शतकमा नेपालले बनायो ३१३ रन
पहिले ब्याटिङ गरेको नेपालका लागि ओपनर आसिफ शेखले शानदार शतक प्रहार गरे। उनले १०६ बलमा ८ चौका र ४ छक्काको मद्दतले १०२ रन बनाए।
आसिफले अर्का ओपनर अर्जुन कुमालसँग पहिलो विकेटका लागि ९७ रनको साझेदारी गर्दै नेपाललाई बलियो सुरुवात दिलाएका थिए। अर्जुन ४३ रन बनाएर रनआउट भए।
इशान पाण्डेले १३ तथा कप्तान रोहित पौडेलले ४० रन बनाए। गुल्सन झाले आक्रामक ब्याटिङ गर्दै ३८ बलमा ३ चौका र ४ छक्कासहित ५२ रनको अर्धशतकीय पारी खेले। दीपेन्द्रसिंह ऐरीले १८ रन बनाउँदा सन्दीप जोराले पनि योगदान दिए।
वसिर अहमद १५ र ललित राजवंशी १ रनमा अविजित रहे।
युएईका इब्रार अहमदले सर्वाधिक ४ विकेट लिए। खुजाइमा बिन तान्भिरले २ तथा हैदर अली र अदिब उस्मानीले १–१ विकेट लिए।
लामिछाने प्लेयर अफ द टुर्नामेन्ट
प्रतियोगितामा उत्कृष्ट प्रदर्शन गरेका नेपालका कप्तान सन्दीप लामिछाने प्लेयर अफ द टुर्नामेन्ट घोषित भएका छन्। फाइनलमा शतकीय पारी खेलेका आसिफ शेख प्लेयर अफ द म्याच बने।
नेपालले समूह चरणमा चार खेलमध्ये तीनमा जित हात पारेको थियो। नेपालले बहराइन, मलेसिया र साउदी अरेबियालाई पराजित गर्दा हङकङसँग भने पराजित भएको थियो।
समूह विजेताका रूपमा सेमिफाइनल पुगेको नेपालले ओमानलाई ८७ रनले हराउँदै फाइनलमा स्थान बनाएको थियो।
नेपालले यसअघि सन् २०२३ मा पहिलोपटक एसिया कप खेलेको थियो। घरेलु मैदानमा भएको छनोट खेलमा युएईलाई ७ विकेटले पराजित गर्दै नेपालले पहिलोपटक एसिया कपमा स्थान बनाएको थियो।
