काठमाडौं- राष्ट्रिय बीमा कम्पनी लिमिटेडको चालू आवको दोस्रो त्रैमासिक वित्तीय विवरण अनुसार खुद नाफामा ६०.३४ प्रतिशत गिरावट आएको छ। गत आवको पुस मसान्तसम्म ४४ करोड ६९ लाख रुपैयाँ खुद नाफा कमाएकोमा चालू आवको सोही अवधिमा १७ करोड ७२ लाख रुपैयाँ खुद नाफा कमाएको हो।समीक्षा अवधिमा कम्पनीको खुद बीमाशुल्क आर्जनमा पनि ४६.५८ प्रतिशतको गिरावट भएको तथ्यांकले देखाएको छ। गत आवको पुस मसान्तसम्म १६ करोड ७ लाख रुपैयाँ खुद बीमाशुल्क आर्जन गरेको कम्पनीले चालू आवको पुस मसान्तसम्म ८ करोड ५८ लाख रुपैयाँ मात्रै खुद बीमाशुल्क आर्जन गर्न सफल भएको छ।
.gif)
त्यसैगरी समीक्षा अवधिमै कम्पनीको कुल आम्दानी १८.४५ प्रतिशतले घट्दा कुल खर्च भने ३१.७९ प्रतिशतले बढेको छ। अभिकर्तालाई दिइने कमिशन बापतको रकम पनि कम्पनीले ७९.६७ प्रतिशतको भारी कटौती गरेको छ। कुल आम्दानी ७२ करोड ४९ लाख रुपैयाँबाट ५४ करोड ३६ लाख रुपैयाँमा झर्दा कुल खर्च २७ करोड ७९ लाख रुपैयाँबाट बढेर ३६ करोड ६३ लाख रुपैयाँ नाघेको छ।कम्पनीले अभिकर्तालाई दिइने कमिशन बापतको रकम ७८ लाख रुपैयाँबाट ह्वात्तै घटाएर १५ लाख रुपैयाँमा झारेको छ भने लगानीबाट प्राप्त हुने आम्दानी पनि ४२ करोड ७४ लाख रुपैयाँबाट १८.४५ प्रतिशतले घटेर ३४ करोड ८५ लाख रुपैयाँमा सीमित भएको छ। यससँगै कम्पनीको प्रतिशेयर आम्दानी पनि १३०.०२ रुपैयाँबाट घटेर ६६.४८ रुपैयाँमा कायम भएको छ।चुक्ता पूँजी २६ करोड ६६ लाख रुपैयाँ रहेको कम्पनीको स्पेशल रिजर्भमा ३ अर्ब २४ करोड २१ लाख रुपैयाँ, महाविपत्ति कोषमा ७० करोड ११ लाख रुपैयाँ र जगेडा कोषमा २ अर्ब ५५ करोड ३३ लाख रुपैयाँ सञ्चित रहेको छ। बीमा कोषको आकार ३ अर्ब ७५ करोड ६८ लाख रुपैयाँ रहेको कम्पनीको कुल सम्पत्तिको मूल्य २५ अर्ब २८ करोड रुपैयाँभन्दा माथि रहेको छ।
