क्यालिफोर्निया । अमेरिकी बहुराष्ट्रिय प्रविधि कम्पनी मेटाले १८ वर्ष वा त्यसभन्दा माथिका प्रयोगकर्ताका लागि व्यक्तिगत एआई एजेन्ट सार्वजनिक गरेको छ । कम्पनीले यसको नाम म्यूज राखेको छ । मेटाका अनुसार म्यूजले सामान्य च्याटबोटले जस्तै जानकारी त दिन्छ नै प्रयोगकर्ताको तर्फबाट विभिन्न डिजिटल कामसमेत गर्न सक्छ । यो सेवा हाल अमेरिकामा मात्रै उपलब्ध छ ।म्यूजले इमेल पठाउने, यात्रा बुक गर्ने, अनलाइन किनमेल गर्ने र फर्म भर्ने जस्ता काममा सहयोग गर्न सक्ने कम्पनीले बताएको छ । प्रयोगकर्ताले म्यूजको छुट्टै एप वा ह्वाट्सएपमार्फत यससँग कुराकानी गर्न सक्छन् । यसको अर्को विशेषता लामो समयका लक्ष्य प्राप्तिमा सहयोग गर्नु पनि हो । एक वर्षको व्यायाम योजना बनाउने वा नयाँ व्यवसाय सुरु गर्ने जस्ता लक्ष्यलाई म्यूजले चरणबद्ध कार्ययोजनामा बदल्न सहयोग गर्न सक्छ ।
.gif)
मेटाले म्यूजका सुरक्षा र गोपनीयता सुविधालाई विशेष प्राथमिकता दिएको जनाएको छ । कम्पनीका अनुसार एजेन्ट सुरक्षित भर्चुअल मेसिनमा चल्छ, जहाँ एजेन्ट र प्रयोगकर्ताको डेटा सुरक्षित राखिन्छ । म्यूजलाई एआई च्याटबोटभन्दा फरक बनाउने मुख्य कुरा यसको काम गर्ने क्षमता हो । च्याटबोटले कुनै फ्लाइटको विकल्प र मूल्य बताउन सक्छ भने एआई एजेन्टले प्रयोगकर्ताको निर्देशनअनुसार वेबसाइट खोलेर फर्म भर्ने र बुकिङ प्रक्रिया अगाडि बढाउनेजस्ता काम पनि गर्न सक्छ । यसले गर्ने संवेदनशील काममा भने प्रयोगकर्ताको अनुमति आवश्यक पर्न सक्ने बताइएको छ ।
