काठमाडौं, २६ भदौ । नवनियुक्त उद्योग, वाणिज्य तथा आपूर्तिमन्त्री दीपककुमार शाह नियुक्त भएलगत्तै सरकारले खाना पकाउने एलपी ग्यासको बिक्री तथा वितरणमा कडाइ थालेको छ । बजार अनुगमनका क्रममा सरकारी मूल्यभन्दा बढी रकम लिएर ग्यास बिक्री गर्ने एक किराना पसललाई रु. ३ लाख जरिबाना गरिएको छ ।
.gif)
वाणिज्य, आपूर्ति तथा उपभोक्ता संरक्षण विभागका अनुसार कागेश्वरी मनोहरा नगरपालिका–६, चखडोलस्थित अनिल किराना पसलले सरकारले तोकेको मूल्यभन्दा महँगोमा एलपी ग्यास बिक्री गरेको पाइएपछि कारबाही गरिएको हो ।
विभागका सूचना अधिकारी अनिल किरातीका अनुसार उक्त पसलले प्रतिसिलिन्डर रु। २ हजार ६० मा बिक्री गर्नुपर्ने सुगम ग्यास रु। २ हजार ६ सयमा बिक्री गरिरहेको अवस्थामा अनुगमन टोलीले फेला पारेको थियो ।
सरकारी मूल्यभन्दा प्रतिसिलिन्डर रु। ५ सय ४० बढी रकम असुल गरेको प्रमाण भेटिएपछि विभागले उपभोक्ता संरक्षण ऐन, २०७५ तथा उपभोक्ता संरक्षण नियमावली, २०७६ बमोजिम पसललाई रु। ३ लाख जरिबाना गरेको जनाएको छ ।
ग्यासको कालोबजारी नियन्त्रणमा कडाइ
एलपी ग्यासको कृत्रिम अभाव र कालोबजारी सम्बन्धी गुनासो बढिरहेका बेला विभागले बजार अनुगमनलाई तीव्र बनाएको जनाएको छ । सरकारले तोकेको मूल्यभन्दा बढी रकम असुल गरी ग्यास बिक्री गर्ने व्यवसायीमाथि तत्काल कारबाही गरिने विभागको भनाइ छ ।
नयाँ आपूर्ति मन्त्री शाह नियुक्त भएसँगै एलपी ग्यासको मूल्य, आपूर्ति व्यवस्था तथा बजारमा हुन सक्ने कालोबजारी नियन्त्रणलाई सरकारले प्राथमिकतामा राखेको संकेत पछिल्लो बजार अनुगमन र कारबाहीले गरेको छ ।
विभागले उपभोक्तालाई सरकारले तोकेको मूल्यमा मात्रै ग्यास खरिद गर्न तथा बढी मूल्य असुल गर्ने व्यवसायीबारे सम्बन्धित निकायमा जानकारी गराउन समेत आग्रह गरेको छ ।
