भोजपुर, २६ साउन । भोजपुरको पौवादुङमा गाउँपालिका–६ ठूलोदुम्मा र हतुवागढी गाउँपालिका–६ को सिमानामा पर्ने फत्तेपुर दोभानमा मोटरेबल बेलिब्रिज निर्माण हुने भएको छ । पिखुवा खोलामा बेलिब्रिज जडान गरी दुई गाउँपालिकालाई प्रत्यक्ष रूपमा जोड्ने प्रक्रिया अघि बढाइएको हो ।
.gif)
पूर्वाधार विकास कार्यालय भोजपुरका अनुसार पुल निर्माणका लागि बोलपत्र आह्वान भइसकेको छ भने आवश्यक प्रशासनिक तथा प्राविधिक प्रक्रिया पूरा भएको छ । वर्षायामका कारण खोलामा पानीको बहाव बढेकाले हाल निर्माण सुरु गर्न नसकिएको कार्यालयले जनाएको छ ।
पूर्वाधार विकास कार्यालय भोजपुरका प्रमुख राजनराज रेड्डीका अनुसार रु २ करोड ६१ लाख ४८ हजार ८३५ लागतमा बेलिब्रिज निर्माण गर्न लागिएको हो । वर्षा कम हुनासाथ निर्माण कार्य सुरु गर्ने तयारी रहेको उनले बताए।
बेलिब्रिज निर्माणको जिम्मेवारी राउन कन्स्ट्रक्सन, उदयपुरले पाएको छ । आगामी भदौको पहिलो सातादेखि निर्माण सुरु गरी निर्धारित समयमै आयोजना सम्पन्न गर्ने लक्ष्य राखिएको कार्यालयले जनाएको छ ।
पौवादुङमा गाउँपालिकाका अध्यक्ष किरण राईले लामो समयको पहल र मेहनतपछि फत्तेपुर दोभानमा बेलिब्रिज निर्माणको प्रक्रिया अघि बढाउन सफल भएको बताउनुभयो । मोटरेबल पुलको अभावमा वर्षौंदेखि स्थानीयवासीले आवतजावतमा समस्या झेल्दै आएको भन्दै पुल निर्माणपछि यातायात सहज हुने उनको भनाइ छ ।
अध्यक्ष राईका अनुसार पुल निर्माण सम्पन्न भएपछि क्षेत्र अरुण करिडोरसँग सहज रूपमा जोडिनेछ । त्यसपछि तिवारी भञ्ज्याङदेखि धरानसम्मको दूरी करिब ८१ किलोमिटरमा सीमित हुने र यसबाट यातायात, व्यापार तथा सेवा प्रवाहमा समेत सुधार आउने अपेक्षा गरिएको छ ।
स्थानीयवासीका अनुसार स्थायी पुलको अभावमा विशेषगरी वर्षायाममा पिखुवा खोला पार गर्न निकै कठिन हुने गरेको छ । पुल निर्माणपछि दैनिक आवतजावत तथा स्थानीयको जीवनयापन सहज हुने स्थानीय सरोज राईले बताए ।
फत्तेपुर दोभानमा बेलिब्रिज निर्माणलाई स्थानीयस्तरको यातायात पूर्वाधार सुधारसँगै भोजपुरका ग्रामीण क्षेत्रलाई अरुण करिडोर तथा धरानसँग जोड्ने महत्वपूर्ण पूर्वाधारका रूपमा हेरिएको छ ।
